Ўзбекистонлик ёш олимлар Татаристоннинг етакчи олий таълим ташкилотларида стажировка ўтайдилар

Илм-фанни молиялаштириш ва инноватсияларни қўллаб-қувватлаш жамғармаси ижро этувчи директори Жонибек Тавакалов бошчилигида Татаристон Республикасида хизмат сафарида бўлиб турган делегатциямиз вакиллари иштирокида Қозон федерал университети раҳбарияти ва жамоаси билан учрашув ташкил этилди.

Учрашув натижасида Ўзбекистонлик ёш олимлар мазкур университетда илмий стажировка ўташлари юзасидан Инноватсион ривожланиш агентлиги, Жамғарма ва Қозон федерал университети ўртасида келишув имзоланди.

Унинг шартларига кўра, жорий йилнинг май ойида стажировка танлови эълон қилинади ва йилнинг 3-чорагидан ёш олимларимиз илмий стажировкага юборилади.   

Ташриф давомида стажировка ўтовчилар учун мавжуд яшаш шароитлари ҳам ўрганилди.

Маълумот учун, Қозон федерал университетига 1804-йилда асос солинган ва у Россиянинг энг кучли олий таълим муассасалари “Топ-20” рўйхатига киритилган. 2023-йилда таълим маскани Россия университетлари орасида хорижлик талабалар сони бўйича 3-ўринни эгаллаган.