Tog‘ chang‘isi sporti bo‘yicha ochiq master-klass tashkil etildi

Sportchilarni xalqaro musobaqalarga tayyorlash, ularning sport mahorati va amaliy ko‘nikmalarini oshirish, shuningdek, qishki sport turlarini rivojlantirish maqsadida maxsus mashg‘ulotlar tashkil etilmoqda.

Shu maqsadda O‘zbekiston davlat jismoniy tarbiya va sport universitetining Qishki sport turlari bo‘yicha simulyatsiya markazida tog‘ chang‘isi sport turi bo‘yicha ochiq master-klass tashkil etildi.

Mashg‘ulot davomida dastlab ishtirokchilarga xavfsizlik texnikasi bo‘yicha tushunchalar berilib, “SkiMachine” maxsus sport trenajyorining imkoniyatlari bilan tanishtirildi. Shundan so‘ng “Burilishlar texnikasi” mavzusida nazariy va amaliy mashg‘ulotlar o‘tkazildi.

Amaliy mashg‘ulotlarda sportchilar trenajyor yordamida tog‘ chang‘isida burilishlarni to‘g‘ri bajarish, harakatlarni muvofiqlashtirish, texnik xatolarni bartaraf etish hamda xavfsizlik qoidalariga rioya qilish bo‘yicha ko‘nikmalarini mustahkamladi.

Master-klassning asosiy maqsadi tog‘ chang‘isi sporti bilan shug‘ullanuvchi sportchilarning texnik tayyorgarligini takomillashtirish, burilishlar texnikasini o‘zlashtirish hamda ularning musobaqalarda samarali va xavfsiz ishtirok etishlari uchun zarur amaliy ko‘nikmalarini rivojlantirishdan iborat bo‘ldi.

Tadbir yakunida ishtirokchilar tomonidan mavzuga oid savollar berilib, ularga batafsil javoblar va amaliy tavsiyalar taqdim etildi.

Mazkur master-klass sportchilarning kasbiy mahoratini oshirish, zamonaviy sport trenajyorlaridan samarali foydalanish va qishki sport turlarini rivojlantirishga xizmat qiladi.