AMALIYOT UCHUN HAQ TO‘LASH TALABAGA HAM RAG‘BAT, HAM ISHONCH
Har bir inson o‘zining muvaffaqiyat kalitini topishida qobiliyati va shaxsiyatiga mos kasbni tanlash muhim o‘rin tutadi. To‘g‘ri tanlangan kasb-hunar — kelajakdagi ishonch, xotirjamlik va moddiy farovonlik, demak. Kasbini sevuvchi inson unga mas’uliyat bilan yondashib, vazifalarini puxta bajaradi, sohaning ichida yashashni boshlaydi. Bu esa, o‘z navbatida, jamiyat rivojiga ham bevosita hissa bo‘lib qo‘shiladi.
Jonibek TAVAKALOV,
Ilm-fanni moliyalashtirish va
innovatsiyalarni
qo‘llab-quvvatlash jamg‘armasi
ijrochi direktori
Kasbni to‘g‘ri tanlash uchun inson o‘smir yoshidayoq qiziqishi, salohiyati va kelajakda o‘zini qaysi sohada ko‘ra olishini tahlil qilishi zarur. Shuningdek, kelajakda ishsizlikdan aziyat chekib, iqtisodiy muammolarga duch kelmaslik uchun yana bir muhim omil bu — mehnat bozoridagi vaziyatni o‘rganish va yo‘nalishiga mos oliy ta’lim muassasasini tanlash. Zero, mehnat bozoridagi vaziyatni o‘rganmaslik kadrlar tayyorlashdagi nomutanosiblikka va iqtisodiyotning ayrim tarmoqlarida mutaxassislar yetishmovchiligiga olib kelishi mumkin. Shuni ta’kidlash joizki, oliy ta’lim muassasalarida yosh mutaxassislarni tayyorlash sifati nafaqat talabalarning nazariy o‘quv kursi davomida olgan bilimiga, balki bilim va ko‘nikmalarini amalda qo‘llash va mustahkamlash, ishlab chiqarish va amaliy mashg‘ulotlar davomida oshirgan tajribasiga bevosita bog‘liq.