Oʻzbekiston Respublikasi Vazirlar Mahkamasining “Respublika hududlarida yoshlar texnoparklarini tashkil etish chora-tadbirlari toʻgʻrisida” 2020-yil 22-maydagi 313-son qaroriga muvofiq yoshlarni ilm-fan sohasiga jalb etish, ularning tashabbuslarini qoʻllab-quvvatlash, zamonaviy kasblarga o‘qitish tizimini takomillashtirish maqsadida respublikaning 13 ta hududida Yoshlar texnoparklari tashkil etildi.

Ularda Web-dasturlash, Robototexnika, 3D modellashtirish, Elektronika, Video montaj, Grafik dizayn kabi 7 turdagi o‘quv kurslari faoliyat yuritmoqda.  

Mazkur Yoshlar texnoparklarida 2023-2025-yillar oraligʻida yoshlarni innovatsion faoliyatga keng jalb qilish, ularning g‘oyalarini qoʻllab-quvvatlash maqsadida OTM va maktablarda 1 000 dan ortiq targ‘ibot tadbirlari seminar va treninglar tashkil etilib, 84 000 dan ortiq yoshlar ushbu tadbirlarda ishtirok etdi.

Shu bilan birga, Yoshlar texnoparklarida yosh ixtirochi olimlarning gʻoyalarini biznes-modelga aylantirish, biznes boshqaruvida koʻmaklashish hamda yoshlarning tadbirkorlik salohiyatini oshirish maqsadida 2023-yildan boshlab “InnoX” biznes-inkubator va akselerator dasturi tashkil etildi.

2023-2025-yillar oraligʻida Dasturda ishtirok etishni bildirgan 5 431 nafar yoshlar tomonidan arizalar kelib tushib, shundan eng yaxshi 1 175 nafar loyiha tashabbuskorlari saralab olinib oʻquv jarayonlarida ishtirok etishdi.

Oʻquv jarayoni yakunida 740 nafar loyiha tashabbuskorlari Dasturni muvaffaqiyatli yakunlab, shundan 434 ta loyiha umumiy qiymati 24 mlrd soʻm miqdorda moliyalashtirildi.

Natijada, 76 ta yangi korxonalar tashkil etilib, 467 ta yangi boʻsh ish oʻrni yaratildi hamda 316 turdagi yangi ishlanmalar yaratildi.  

Yoshlar texnoparklari rezidentlarining loyiha va ishlanmalari “Kelajak muhandislari” xalqaro festivali, O‘rta Osiyo kreativ yoshlar orasida tashkil etilgan “Green Spark”, “Bo‘lajak olim” kabi qator tanlovlarda e’tirof etilmoqda.

Joriy yilning aprel oyida “Aloqa Venture” tomonidan Yirik investorlar va yosh tadbirkorlar uchun Andijonda tashkil etilgan “Investorlar kuni” yakuni bo‘yicha Andijon yoshlar texnoparki “InnoX” dasturi ishtirokchilarining 3 ta, xususan,  “SpaceAgro”, “EduCompass” va “Tokcha” startaplari  jami 70 000 AQSh dollari hajmida moliyalashtirildi.

Ohangaron Yoshlar texnoparki bilan hamkorlikda amalga oshirilayotgan 1doc.uz loyihasi bosh qarorgohi AQShning silikon vodiysida joylashgan “Plug and Play Tech Center”ning Markaziy Osiyo va Kavkaz mintaqasi bo‘yicha ofisi tomonidan  joriy yilning fevral oyida tashkil etilgan 4-bosqich akseleratsiya dasturi uchun saralab olingan eng yaxshi 15 ta loyiha qatoridan o‘rin oldi. 1DOC.UZ — yuridik hujjatlar bilan ishlash uchun yagona kompleks platforma bo‘lib, shablonlar yaratish, yuridik AI-yordamchisidan foydalanish, ma’lumotlarni raqamlashtirish, elektron imzo qo‘yish va hujjatlarni global tarqatish imkoniyatlarini o‘z ichiga oladi.

Alohida qayd etish kerakki, Yoshlar texnoparklari faoliyatini yanada rivojlantirish borasida doimiy ish olib borilmoqda. Shu maqsadda Nukus, Navoiy, Jizzax, Guliston, Ohangaron, Namangan, Andijon yoshlar texnoparklari hamda Janubiy Koreyaning Kyongnam Texnoparki o‘rtasida hamkorlik memorandumi imzolandi. Mazkur hujjat innovatsion muhitni rivojlantirish, yoshlar uchun qoʻshimcha imkoniyatlar yaratish va startap ekotizimini yangi bosqichga olib chiqishda muhim qadam sanaladi.
Janubiy Koreyaning Koreya mashinasozlik sanoati assotsiatsiyasi bilan tuzilgan kelishuvga asosan esa 2025-2029-yillarda Farg‘ona yoshlar texnoparkida umumiy qiymati 8,0 million AQSH dollariga teng bo‘lgan loyiha amalga oshiriladi. Unga ko‘ra texnoparkka Koreya hukumatining tashqi beg‘araz ko‘mak mablag‘lari hisobidan zamonaviy ishlab chiqarish uskunalari hamda jihozlari olib kelinib, innovatsion faoliyatni rivojlantirish uchun yanada qulay sharoit yaratiladi. Shuningdek, loyiha doirasida o‘zbekistonlik mutaxassislar Koreya Respublikasidagi yetakchi ishlab chiqarish korxonalari faoliyati bilan tanishishlari, malaka oshirishlari va tajriba almashishlari rejalashtirilmoqda.