Германия билан таълим ва илмий алоқаларни янада ривожлантириш мақсадида фундаментал лойиҳаларни ҳамкорликда молиялаштириш амалга оширилади

Жорий йилнинг 19-сентябр куни Олий таълим, фан ва инновациялар вазирлиги ҳузуридаги Илм-фанни молиялаштириш ва инновацияларни қўллаб-қувватлаш жамғармаси ижро этувчи директори Жонибек Тавакалов Германия Федератив Республикаси Германия тадқиқот жамғармаси вакиллари билан учрашув ўтказди.

Учрашувда қўшма илмий лойиҳаларни ҳамкорликда молиялаштириш имкониятлари ва истиқболлари ҳамда Ўзбекистон ёш олимларини Германиянинг етакчи илмий ташкилотларида илмий стажировклаларини ташкил этиш масалалари муҳокама қилинди.

Ўзбекистон Республикаси Президенти Шавкат Мирзиёевнинг таклифига биноан Германия Федератив Республикаси Федерал Канцлери Олаф Шольц 15-16 сентябрь кунлари расмий ташриф билан мамлакатимизда бўлди.

Самарқанд шаҳридаги Конгресс марказида Ўзбекистон Республикаси Президенти Шавкат Мирзиёев ва Германия Федерал Канцлери Олаф Шольцнинг тор доирада ва делегациялар иштирокидаги музокараларда икки мамлакат етакчи ташкиолтлари ўртасида таълим ва илмий алоқаларни ривожлантириш таъкидланди.

Германия Федератив Республикаси Федерал Канцлери Олаф Шольцнинг ташрифи доирасида Германиянинг бир қанча етакчи ташкилотлари делегациялари мамлакатимизга ташриф буюрди. Хусусан, Германия тадқиқот жамғармаси вакиллари ҳам Олий таълим, фан ва инновациялар вазирлиги ҳузуридаги Илм-фанни молиялаштириш ва инновацияларни қўллаб-қувватлаш жамғармаси билан илм-фан ва инновациялар соҳасида ҳамкорлик қилиш юзасидан катта қизиқиш билдирди.

Маълумот учун. Германия тадқиқот жамғармаси Германияда фундаментал тадқиқотларни молиялаштирувчи, йиллик бюджети 4 миллиард еврога яқин Европадаги энг йирик ташкилотлардан бири. Йиллик молиялаштирадиган лойиҳалари сони 30 000 га яқин бўлиб, уларнинг аксариятини халқаро ҳамкорликни лойиҳалари ташкил этади.

Шу муносабат билан, жорий йилнинг 19 сентябрь куни Германия тадқиқот жамғармаси вакиллари билан Олий таълим, фан ва инновациялар вазирлиги ҳузуридаги Илм-фанни молиялаштириш ва инновацияларни қўллаб-қувватлаш жамғармаси вакиллар ўртасида учрашув ташкил этилди.

Учрашувда кўп томонлама ҳамкорлик истиқболларини ривожлантириш мақсадида икки ташкилот ходимларини тажриба алмашиш мақсадида амалиётларни ташкил этиш, ўзбек ёш олимларини Германиянинг етакчи илмий ташкилотларида илмий стажировклаларини ташкил этиш ҳамда қўшма илмий лойиҳаларни ҳамкорликда молиялаштириш масалалари муҳокама қилинди.

Маълумот ўрнида. Бугунги кунга қадар Илм-фанни молиялаштириш ва инновацияларни қўллаб-қувватлаш жамғармаси томонидан мамлакатимизнинг 50 нафар ёш олимларини Германиянинг етакчи 30 га яқин илмий ташкилотларида илмий стажировка ўташ харажатлари молиялаштирилган.

Шунингдек, Германия Федерал Таълим ва тадқиқот вазирлиги билан ҳамкорлик натижаларида “Ўзбекистон-Германия” халқаро илмий лойиҳалар танлови доирасида қиймати 7,25 млрд. сўмлик 8 та илмий лойиҳалар амалга оширилмоқда.